ავტორი: სოფო არდაზიშვილი
თანამედროვე ეპოქაში, სადაც ტექნოლოგიური პროგრესი სწრაფი ტემპით მიმდინარეობს, სოციალური მედია ჩვენი ყოველდღიური ცხოვრების მნიშვნელოვან ელემენტად იქცა..
ყველაფერი იმდენად სწრაფად იცვლება, რომ რთულია ბალანსი დავიჭიროთ.. განსაკუთრებით მაშინ, როდესაც საქმე პირად ურთიერთობებს ეხება..
ამ ბლოგში განვიხილავთ, როგორ აისახება სოციალური მედიის აქტიური გამოყენება ადამიანებს შორის ურთიერთობაზე – რა დადებითი მხარეები აქვს, რა გამოწვევებს წარმოშობს და როგორ უნდა დავიჭიროთ იდეალური ბალანსი.
დადებითი გავლენა
კომუნიკაციის გამარტივება – სოციალური მედიის ერთ-ერთი მთავარი უპირატესობა კომუნიკაციის გამარტივებაა.. უმარტივესად შეგვიძლია გავუგზავნოთ შეტყობინება საყვარელ ადამიანებს, უცბათ მოვესიყვარულოთ, გავუზიაროთ ფოტოები ან ვიდეოები, გავახაროთ ისინიც და გაგვიხარდეს ჩვენც და ა.შ. ყოველივე ეს, უმნიშვნელოვანეს ნაწილად იქცა ჩვენი ცხოვრების, უმარტივეს ფორმად კომუნიკაციის..
ახალი ნაცნობების შეძენა – სოციალური მედია, საშუალებას გვაძლევს გავიცნოთ საერთო ინტერესების მქონე ადამიანები, ვიპოვოთ მსგავსი ჰობის მქონე ჯგუფები ან დავუკავშირდეთ სპეციალისტებს, რომელთაგანაც სასარგებლო ინფორმაციას მივიღებთ.. ეს კი ზრდისა და განვითარების მხრივ ახალ შესაძლებლობებს იძლევა.. მეტიც, ჩვენს გარშემო ბევრს, თავისი მეორე ნახევარიც კი უპოვია სოც ქსელების მეშვეობით..
ინფორმაციის სწრაფად გაზიარების შესაძლებლობა – სოციალური მედიის დადებითი მხარეა ისიც, რომ სიახლეების გაზიარება რეალურ დროში ხდება.. ახალი ამბების დროულად გაცნობის შესაძლებლობა კი დღეს ყველასთვის ხელმისაწვდომია..
უარყოფითი გავლენა
სოციალურ ქსელებში ხანგრძლივი დროის გატარება – სოცმედიის ერთ-ერთი მთავარი უარყოფითი ფაქტორი, არის ზედმეტად დიდი დროის დათმობა სოციალური პლატფორმებისთვის.. სამსახური, საცობები, სახლის საქმეები, მრავალი მრავალი რამ, რის გამოც, სოც. ქსელებში კომუნიკაციამ, ერთგვარი შვება მოგვიტანა ყოველდღიურ გადატვირთულ გრაფიკში, თუმცა, მეორეს მხრივ რეალურ ურთიერთობებზე ფოკუსის დაკარგვა განაპირობა.. ეს თავისთავად, პირად და სოციალურ ცხოვრებაზე უარყოფით ზეგავლენას ახდენს..
ზედაპირული კომუნიკაცია – სოციალურ ქსელებში ურთიერთობა ხშირად ანაცვლებს პირისპირ შეხვედრებს.. ემოციები, მიმიკები, ჟესტები და ყველაფერი ის, რასაც რეალურ ცხოვრებაში დიდი მნიშვნელობა აქვს, სოციალურ მედიაში იკარგება ან ზედაპირულ ფორმას იღებს, შედეგად კი, ხშირად მისკომუნიკაციის პრობლემა დგება, მისკომუნიკაციას მცირე კონფლიქტები მოსდევს, საბოლოოდ კი, ორივე მხარისათვის გაუგებარი მიზეზებით, ურთერითობის დაკარგვამდეც კი შეიძლება მივიდეთ..
არასრულფასოვნების განცდა – სოციალური მედია სავსეა „იდეალური“ ფოტოებითა და პოსტებით. ეს ყველაფერი კი ხშირად იწვევს არასრულფასოვნების კომპლექსის ჩამოყალიბებას, განსაკუთრებით იმ შემთხვევაში, თუ მუდმივად ვადარებთ ჩვენს ცხოვრებას სხვების „ბრწყინვალე“ პროფილებს..
როგორ დავიჭიროთ ბალანსი?
დროის ეფექტურად მართვა – შეეცადეთ განსაზღვროთ ყოველდღიური ან ყოველკვირეული ლიმიტები სოციალური მედიის გამოყენებაზე. ხომ გსმენიათ, ზედმეტი რომ არაფერი ვარგა.. ეს როგორც დროის უკეთ განაწილებაში, ასევე მნიშვნელოვან საკითხებზე ფოკუსირებაშიც დაგეხმარებათ!
რეალური ურთიერთობების დაპრიორიტეტება – პრიორიტეტი მიანიჭეთ საყვარელ ადამიანებთან პირისპირ დროის გატარებას. დაუთმეთ დრო რეალურ კომუნიკაციას, რათა არ დაკარგოთ მათთან ემოციური სიახლოვე. თუნდაც ნახევარი საათით, მათთან ფიზიკურად გატარებული დრო, დამერწმუნეთ ემოციურად ბევრი სიკეთის მომტანი იქნება თქვენი მენტალური ჯანმრთელობისთვის!
კრიტიკული აზროვნება – ნუ დაიჯერებთ ყველაფერს, რასაც სოციალურ მედიაში ხედავთ. ჩართეთ კრიტიკული ანალიზი ნებისმიერ სიახლეზე გადაწყდომისას.. მოიკვლიეთ სხვადასხვა სანდო წყაროებში და დარწმუნდით გაზიარებული ინფორმაციის რეალობაში.. ასევე, გახსოვდეთ, რომ ადამიანები, თავიანთ სოც.ქსელებში ხშირად აჩვენებენ თავიანთი ცხოვრების იმ მომენტებს, რაც საუკეთესოდ მიაჩნიათ, ან ისეთ ფოტოებს, სადაც უნაკლოდ გამოიყურებიან, თუმცა ეს საერთოდ არ ნიშნავს, რომ მათ იდეალური ცხოვრება აქვთ, და თქვენი წარმატების ათვლის წერტილად მათ ფოტო ალბომს ნუ გამოიყენებთ.. სინამდვილეში ყველანი ერთნაირი ადამიანები ვართ, და ყველას ერთნაირად გვიჭირს და გვილხინს!
პირადი საზღვრების დაცვა – პირადი ცხოვრების გასაჯაროება რისკის შემცველია. გააზრებულად მოეკიდეთ იმას, თუ რას აზიარებთ სოციალური მედიის საშუალებით და როგორ შეიძლება ამან გავლენა იქონიოს თქვენს ურთიერთობებზე.. ამასთან, როგორ შეიძლება იქნეს თქვენს მიერ გაზიარებული ფოტოები გამოყენებული!
და ბოლოს..
ყველანი ვთანხმდებით, რომ სოციალური მედია თანამედროვე სამყაროში უმნიშვნელოვანეს პლატფორმად იქცა. ერთის მხრივ, ეს კომუნიკაციისა და ინფორმაციის გაცვლის მძლავრი ინსტრუმენტია, რომლის დახმარებითაც ადამიანებს შორის დისტანციები მცირდება; მეორეს მხრივ, შესაძლოა, ზედაპირული და ტყუილზე დაფუძნებული ურთიერთობები მივიღოთ..
საუკეთესო გამოსავალი რეალური და ვირტუალური სამყაროს დაბალანსებაა!
სოციალური მედია უნდა გამოვიყენოთ, როგორც კომუნიკაციის ხელშემწყობი ინსტრუმენტი, რომელიც ჩვენს ურთიერთობებს გაამრავალფეროვნებს, მაგრამ არასდროს დავივიწყოთ რეალური შეხვედრებისა და უშუალო საუბრების უპირატესობა და მნიშვნელობა!
ვიცი დამეთანხმებით, პირისპირ გატარებული წუთები საყვარელ ადამიანებთან, ემოციურად მეტად შემავსებელია ჩვენი შინაგანი სამყაროსი, ვიდრე ეკრანთან გატარებული საათები..
სიყვარულით,
სოფო 🌸
