ავტორი: სოფო არდაზიშვილი
ჯონ გოთმენის წიგნი „წარმატებულიი ქორწინების 7 პრინციპი“ (The Seven Principles for Making Marriage Work) აერთიანებს იმ პრაქტიკულ მიდგომებს, რომლებიც გრძელვადიანი, ბედნიერი და ჰარმონიული ურთიერთობის შენარჩუნებაში გვეხმარება.
წინა ბლოგში, ჩვენ უკვე ვისაუბრეთ პირველ პრინციპზე, რომელიც „სიყვარულის რუკების“ შექმნისაკენ მოგვიწოდებდა, დღევანდელ ბლოგში კი, როგორც დაგპირდით, მეორე პრინციპის – სიყვარულისა და მადლიერების გამოხატვის მნიშვნელობაზე მოგიყვებით, რომლის მთავარი იდეაც პარტნიორის დადებითი თვისებების დაფასება და აღნიშვნაა.
რატომ არის მნიშვნელოვანი სიყვარულისა და მადლიერების გამოხატვა?
გოთმენის კვლევები აჩვენებს, რომ ურთიერთობებში, სადაც წყვილები ხშირად აღნიშნავენ ერთმანეთის დადებით თვისებებს, ნეგატიურ ემოციებს ნაკლებად ავლენენ.
მნიშვნელოვანია ისიც, რომ ბედნიერი წყვილები არა მხოლოდ საწყის ეტაპზე გამოხატავენ სიყვარულს, არამედ ყოველდღიურად ცდილობენ, რომ პარტნიორის მიმართ თბილი გრძნობები გამოავლინონ, რაც ურთიერთობის ხარისხზე დადებითად აისახება.
ნეგატიურისა და დადებითის ბალანსი
გოთმენის თეორიაში ხაზგასმულია, რომ ბედნიერი წყვილები ერთმანეთის დადებით ქცევებზე უფრო კონცენტრირდებიან, ვიდრე ნეგატიურ დეტალებზე. მისი თქმით, „ენერგია მიედინება იქ, რაზეც ყურადღებას ვამახვილებთ“, რაც იმას ნიშნავს, რომ წყვილებმა ყოველდღიურად უნდა გამოხატონ მადლიერება ერთმანეთის მიმართ, თუნდაც სულ პატარა დეტალებით, რათა ნეგატიური აზრები და ქცევები მინიმუმამდე დაიყვანონ.
კვლევებმა ასევე აჩვენა, რომ წყვილები, რომლებიც თავიანთ ქორწინებას ბედნიერად არ მიიჩნევენ, ხშირად, ვერ ამჩნევენ პარტნიორის პოზიტიურ ქცევებს. ეს კი ურთიერთობის განვითარებას კიდევ უფრო აფერხებს.
როგორ განისაზღვრება რა არის ნორმა?
ამ ყველაფრის შემდეგ, ბუნებრივია, ჩნდება კითხვა – რა ითვლება ყურადღებისა და მადლიერების გამოხატვის ნორმად? ამისათვის, გოთმენი გვთავაზობს სპეციალურ კითხვარს, რომელიც დაგეხმარებათ შეაფასოთ, რამდენად ძლიერი და ჯანსაღია თქვენი „სიყვარულისა და მადლიერების გამოხატვის სისტემა“.
თუ პასუხების უმრავლესობა დადებითია, ეს ნიშნავს, რომ თქვენი ურთიერთობა სწორ გზაზეა.
გოთმენი გვთავაზობს ოთხ ძირითად სავარჯიშოს, რომლებიც წყვილებს ეხმარება ისწავლონ სიყვარულის გამოხატვა, ერთმანეთის შექება და დაფასება:
1. მადლიერების გამოხატვა
შეარჩიეთ რამდენიმე მიზეზი, რის გამოც მადლიერი ხართ თქვენი პარტნიორის მიმართ, და გაუზიარეთ მას. ეს ვარჯიში ხელს უწყობს ერთმანეთის დადებითი მხარეების კვლავ აღმოჩენას.
2. ისტორიის გახსენება
გაიხსენეთ თქვენი გაცნობისა და ურთიერთობის საწყისი პერიოდი. ამგვარი მოგონებები ხშირად წყვილებს საშუალებას აძლევს, თავიდან განიცადონ ძველი, დადებითი ემოციები.
3. დადებითი ფიქრები
დღის განმავლობაში ფოკუსირდით პარტნიორის დადებით თვისებებზე და შეეცადეთ, უარყოფითი აზრები მინიმუმამდე დაიყვანოთ.
4. შვიდკვირიანი პერიოდი
ყოველდღიურად გამოხატეთ სიყვარული, მიუხედავად იმისა, გაქვთ თუ არა ამის განწყობა. დროთა განმავლობაში, ეს ქცევა ავტომატურ ჩვევად იქცევა და თქვენს ურთიერთობას მნიშვნელოვნად გააუმჯობესებს.
ნეირომეცნიერება და თვითგანვითარება
წიგნში გოთმენი აღნიშნავს, რომ ტვინი დროთა განმავლობაში ქმნის ახალ ნერვულ გზებს, თუ ნეგატიურ აზრებს პოზიტიურით ჩავანაცვლებთ. ეს პროცესი ხელს უწყობს პარტნიორის დადებითი მხარეების უფრო მკაფიოდ აღქმას, რაც ხელს უწყობს ურთიერთობის ჰარმონიულ განვითარებას.
შეჯამებისთვის..
სიყვარულისა და მადლიერების გამოხატვა ურთიერთობის ის კომპონენტია, რომელიც სტაბილურობის შეგრძნებას ანვითარებს. თუკი ეს პრინციპები ყოველდღიურ ცხოვრებაში დაინერგება, ურთიერთობები უფრო მყარი, ჯანსაღი და სასიამოვნო გახდება ორივე პარტნიორისთვის.
მიეცით საკუთარ თავს და თქვენს ურთიერთობას შანსი, განვითარდეთ და გააძლიეროთ კავშირი ამ პრაქტიკული რჩევების საშუალებით. ჩვენ კი შემდეგ ბლოგში წარმატებული ქორწინების მესამე პრინციპის შესახებ მოგიყვებით.
სიყვარულით,
სოფო🌸
