ავტორი: სოფო არდაზიშვილი
ქორწინება მხოლოდ სიყვარული და ვალდებულება არ არის. ეს არის დინამიკური ურთიერთობა, რომელიც მოითხოვს კომპრომისებს, ურთიერთგაგებასა და ერთმანეთის აზრის გათვალისწინებას!
ჯონ გოთმენისა და ნან სილვერის წიგნში „წარმატებული ქორწინების 7 პრინციპი“ (The Seven Principles for Making Marriage Work) განხილული მეოთხე პრინციპი გვეუბნება: „მიიღეთ პარტნიორის გავლენა“.
თუ რას გულისხმობს ავტორი და როგორ დაგეხმარებათ ეს პრინციპი თქვენი ურთიერთობის გაუმჯობესებაში, ამას დღევანდელ ბლოგში მოგიყვებით.
რატომ არის ეს პრინციპი მნიშვნელოვანი?
როდესაც ერთი ან ორივე პარტნიორი, მეორე ნახევრის აზრის გათვალისწინებაზე უარს ამბობს, ურთიერთობაში დისბალანსი დგება. ეს შეიძლება ერთ-ერთის დომინანტობით გამოიხატებოდეს, მეორე კი თავს დაჩაგრულად გრძნობდეს. ბედნიერი და წარმატებული ქორწინება კი დაფუძნებულია ურთიერთშეთანხმებაზე და არა ერთპიროვნულ გადაწყვეტილებებზე.
გოთმენის კვლევების მიხედვით, მამაკაცები, რომლებიც მეუღლის აზრს ითვალისწინებენ, უფრო მყარი და სტაბილური ქორწინება აქვთ. თუმცა, ეს პრინციპი ორივე სქესისთვის თანაბრად მნიშვნელოვანია. პარტნიორის გავლენის მიღება არ ნიშნავს, რომ უნდა დაეთანხმოთ ყველაფერს, რასაც ის ამბობს, უბრალოდ უნდა მოუსმინოთ, გაითვალისწინოთ და ერთად მიიღოთ გადაწყვეტილებები.
როგორ გამოვიყენოთ მეოთხე პრინციპი?
1. მოუსმინეთ გულისყურითა და პატივისცემით
მნიშვნელოვანია, რომ თქვენი პარტნიორის მოსაზრებები და ემოციები არ უგულებელყოთ. ურთიერთობაში დიდ როლს თამაშობს არა მხოლოდ საუბარი, არამედ მოსმენაც.
იზრუნეთ რომ თქვენმა პარტნიორმა თავი მნიშვნელოვან და დაფასებულ პიროვნებად იგრძნოს.
2. გადაწყვეტილებები ერთად მიიღეთ
ქორწინება პარტნიორობაა, სადაც მნიშვნელოვანი გადაწყვეტილებები ერთობლივად მიიღება. ეს ეხება ფინანსებს, შვილების აღზრდას, ოჯახურ საქმეებსა და სხვა მნიშვნელოვან საკითხებს.
3. აღიარეთ პარტნიორის ძლიერი მხარეები
როდესაც ვაფასებთ და აღვნიშნავთ პარტნიორის ძლიერ მხარეებს, ხელს ვუწყობთ ურთიერთობის ჯანსაღ დინამიკას.
არ აღიქვათ თქვენი მეუღლე კონკურენტად, პირიქით, შეხდეთ როგორც თანაგუნდელს, რომლის მხარდაჭერა და შეხედულებები თქვენთვის ღირებულია.
4. იყავით მზად კომპრომისებისთვის
ყველა უთანხმოება არ უნდა იქცეს კამათის მიზეზად. ეცადეთ, მოძებნოთ ოქროს შუალედი, რომელიც ორივეს დააკმაყოფილებს.
კომპრომისი არ ნიშნავს დანებებას; ეს არის ურთიერთპატივისცემისა და თანასწორობის მაგალითი.
5. გააღრმავეთ ემოციური კავშირი
როცა პარტნიორები ერთმანეთის გავლენის მიღებას არ უშინდებიან, აძლიერებენ ემოციურ კავშირს. პარტნიორის მოსაზრებების გათვალისწინება და მისი ემოციების გაზიარება ხელს უწყობს ნდობის განმტკიცებას.
პატარა ცვლილებები = დიდ შედეგებს?
წარმოიდგინეთ, რომ თქვენ და თქვენი პარტნიორი არჩევთ, სად გაატაროთ შვებულება. ერთს ზღვა მოსწონს, მეორეს – მთები. თუ ერთი მხარე უგულებელყოფს მეორეს სურვილს, ურთიერთობაში ემოციური დისბალანსი იჩენს თავს. მაგრამ თუ ორივე მხარე გაითვალისწინებს ერთმანეთის მოსაზრებებს და იპოვის კომპრომისს (მაგალითად, ჯერ მთაში გაატარებენ რამდენიმე დღეს, შემდეგ კი ზღვაზე წავლენ), ეს ქორწინებას უფრო ჯანსაღსა და ბედნიერს გახდის.
ქორწინება მუდმივი მოგზაურობაა, რომელიც კომპრომისებსა და პატივისცემას მოითხოვს. პარტნიორის აზრის გათვალისწინება არ ნიშნავს საკუთარი ნების უარყოფას, არამედ ურთიერთგაგების გაღრმავებასა და კავშირის გაძლიერებას.
თუ მზად ხართ, რომ თქვენი პარტნიორის შეხედულებებს ყურადღება მიაქციოთ და გადაწყვეტილებები ერთად მიიღოთ, თქვენი ურთიერთობა უფრო ჯანსაღი, ბედნიერი და მტკიცე იქნება. გახსოვდეთ, ქორწინება გუნდური თამაშია და გამარჯვება ერთად უნდა მოიპოვოთ! 💛
სიყვარულით,
სოფო🌸
